Vjenë, 25 shkurt - Organizata për media e Evropës Juglindore, SEEMO, me seli në Vjenë, i ka dënuar fuqishëm kërcënimet kundër gazetarit të Kohës Ditore, Vehbi Kajtazi, nga Sabit Geci, ish komandant i UÇK-së.

“SEEMO është shumë e alarmuar nga qëndrimi pasiv i një institucioni zyrtar, siç është policia, kur janë raportuar kërcënimet ndaj gazetarëve”, thuhet në kumtesën e kësaj organizate, dhe theksohet se është “me rëndësi që autoritetet dhe zyrtarët e qeverisë t’i mbështesin gazetarët, duke u dhënë ndihmën e domosdoshme kur ata kërcënohen”.

SEEMO kërkon që autoritetet në Prishtinë ta hetojnë këtë rast dhe të ndërmarrin masa, në mënyrë që incidente të këtilla të mos ndodhin në të ardhmen.