Dënohet me 4 vjet e gjysmë burg për grabitje dhe tentim vrasje

Prishtinë, 25 maj - Fevzi Zeqa, i akuzuar për grabitje dhe tentim vrasje në dhjetor të vitit të kaluar, në qendër të Prishtinës, është “dorëzuar” të enjten. Ai para trupit gjykues ka pranuar kryerjen e këtyre dy veprave penale për të cilat ishte arrestuar ditën kur i ka kryer. Pas kësaj, ai automatikisht është shpallur fajtor dhe është dënuar me katër vjet e gjysmë burg. Ndërkaq prokurori i rastit, Blerim Isufaj, nuk është ndarë i kënaqur me dënimin.

“Kam paralajmëruar ankesë në shkallë të dytë”, ka thënë Isufaj.

Fevzi Zeqa, 30-vjeçar nga Vushtrria, natën e 23 dhjetorit të vitit që shkoi e kishte plaçkitur Blerina Sadikun, 26-vjeçare, nga Prishtina, në rrugën” Ilaz Kodra” në lagjen “Dardania”, si dhe e kishte plagosur me thikë Bujar Asllanin, 18-vjeçar, nga Prishtina, i cili po përpiqej ta shpëtonte 26-vjeçaren, të cilën Zeqa po e plaçkiste.

Blerina Sadiku atë natë kur ishte përballur me plaçkitje, kishte qenë në shoqëri të vajzës së hallës. Ajo ishte nisur drejt stacionit të autobusëve për të udhëtuar për në Mitrovicë. E gjitha kishte filluar pasi që Zeqa ia kishte “prerë” rrugën dhe e kishte kapur për çante. Ajo i kishte bërë rezistencë për disa minuta, duke mos e lëshuar çantën nga krahu. Bujar Asllani kishte dalë atë natë për xhiro së bashku me një shok dhe më të dëgjuar zërin për ndihmë ishte afruar te Blerina. Përderisa Bujari po përpiqej ta largonte plaçkitësin, ai kishte nxjerrë thikën dhe e kishte therur në bark. Më pas ishte rikthyer edhe njëherë te Blerina, dhe duke tentuar t’ia presë rripat e çantës ia kishte gërvishtur dorën edhe asaj me thikë. Pas këtij tentimi, Fevzi Zeqa kishte arritur ta grabiste çantën dhe ishte larguar për t’u zënë pas pak kohe nga policia.

E dëmtuara Blerina Sadiku ka thënë për gazetën se Fevzi Zeqa përmes disa vërtetimeve se “është i sëmurë” nga epilepsia dhe me arsyetimin se ka gjendje të rëndë ekonomike, gjë e cila e ka shtyrë të bëjë një akt të tillë, është munduar që të justifikohet për veprat e kryera.

“Ajo që ka bërë ai nuk arsyetohet me asgjë. Një numër i madh i popullit tonë është në gjendje të rëndë ekonomike, por kjo nuk është arsye për të bërë krim. Po ashtu as sëmundja nuk është. Njeriu i sëmurë nuk mundet me dalë e me plaçkit njerëz të pafajshëm dhe nuk tenton të vrasë njerëz”, ka thënë Blerina.

Sipas Blerinës, duke marrë parasysh që është rrezikuar direkt jeta e saj dhe e Bujar Asllanit, “dënimi është dashur të jetë edhe më i ashpër”.

E i ati i Fevziut, Remzi Zeqa, është shprehur jashtëzakonisht i pakënaqur me vendimin e gjykatës. Ai veprimin e të birit e ka arsyetuar duke thënë se ai është njeri i sëmurë dhe nuk ka ditur çfarë po bën.

“Fevzia e ka epilepsinë. Nuk ka pas para me ble barna. Pat mbet pa to një javë, dhe kjo ka qenë arsyeja që ja ka marrë çantën asaj çikës”, ka shpjeguar Remziu.

Remziu ka thënë se i biri i tij nuk do të mund ta përballojë burgun për shkak të gjendjes së keqe shëndetësore. Madje ai ka treguar se Fevziu e ka lënë të fejuarën shtatzënë dhe në rrezik të madh.

“Ajo çika ka ba be, se nëse Fevzia dënohet, do të bëjë vetëvrasje. Më zi do ta marrë në qafë edhe beben”, ka shtuar Remziu, baba i të dënuarit.

Komente (5)Shpërndaje artikullin

• 22:39Nga Serbia duhet të kërkohet kompensimi i dëmeve të luftës
• 22:30Peja shpallet kampione e BKT Superligës
• 22:21Tahiri priti biznesmenë nga Bursa
• 22:20Gjykata ukrainase nuk lejon mbajtjen e marshit homoseksual
• 22:19Daçiq porosit serbët e Kosovës të dalin në zgjedhje
• 22:15Gjermania, vendi më pozitiv në botë, Irani më negativi
• 22:12Niko Komani “i fut duart” Gentës
• 22:03Më shumë produkte të rrezikshme në Evropë
• 22:01Hitzfeld: Votoj për Bayernin, për shkak të Shaqirit!
• 21:50Ancelotti i sugjeron Real Madridit blerjen e Cavanit