PDK-ja e LDK-ja s`flasin për projekte, por për mirëqeverisje

Ferizaj, 25 maj- Ditën e dytë të fushatës për balotazh në zgjedhjet e jashtëzakonshme në Ferizaj të dy kandidatët e kanë shfrytëzuar për debate televizive, vizita te familjet e dëshmorëve, si dhe takime elektorale nëpër fshatra. Si kandidati i PDK-së, Agim Aliu, ashtu edhe ai i LDK-së ,Adem Salihaj, më shumë kanë folur për kulturën politike si dhe për qeverisjen e mirë se sa për projekte konkrete për përmirësimin e jetës së qytetarëve. Edhe të enjten liderët e partive Hashim Thaçi dhe Isa Mustafa kishin lënë Prishtinën dhe ua kishin mësyrë fshatrave të Ferizajt, për të qenë përkrah kandidatëve të tyre.



Thaçi: Zgjedhjet në Ferizaj, barometër i skenës politike kosovare



Lideri i PDK-së, Hashim Thaçi, në përkrahje të kandidatit, Agim Aliu, ka falënderuar qytetarët e fshatrave Talinoc, Softaj, Sazli, Papaz dhe Rahovicë në emër të PDK-së, por edhe të Qeverisë për fitoren në raundin e parë, duke shprehur bindjen për rezultat të njëjtë edhe në balotazh.

“Po e shoh në sytë tuaj, po e lexoj në fytyrat tuaj se do të votoni sërish për Agimin”, u drejtohej ai fshatarëve. Thaçi ka shpërndarë falënderime edhe për kategoritë tjera si për mësimdhënësit, personelin mjekësor, e zjarrfikësit duke u përqendruar posaçërisht te pronarët e bizneseve për përkrahjen që po i japin kandidatit të PDK-së. Thaçi zgjedhjet në Ferizaj i ka konsideruar si shumë të rëndësishme duke i vlerësuar si barometër të skenës politike kosovare. Sipas tij, vota për kandidatin e PDK-së është votë për Ferizajn e zhvilluar dhe evropian. Ai ka përsëritur gatishmërinë që të mbështetë çdo projekt të kandidatit Agim Aliu, i cili u cilësua si “njeri i mirë, lider dhe kryetar i mrekullueshëm”. Vetë kandidati Aliu liderin Thaçi e ka cilësuar “promotor të ndryshimeve”, duke mos e fshehur se tërë mbështetjen e ka tek ai për sukseset në qeverisjen, të cilën ai beson se do ta fillojë. ”Nuk është fitore vetëm e PDK-së, por e vlerave politike të krijuara gjatë kohës së qeverisjes, ne instaluam një tolerancë dhe kulturë demokratike në kuvendin komunal”, është shprehur Aliu.

Duke i krahasuar përqindjet me kundërkandidatin, Aliu ka theksuar se ndryshimi në përqindje prej 41 dhe 24 për qind nuk është thjesht numër, por ndryshim në konceptin dhe përkushtimin politik.

Në takimin e PDK-së u përmendën edhe shifra të projekteve të realizuara duke potencuar se për më pak se 5 vjet janë financuar 40 milionë euro, kurse LDK-ja për shtatë vjet ka financuar 17 milionë në projekte.

Takimi u mbyll me thirrjet që të dilet në votime dhe t’i përcillet Kosovës një mesazh i mirë. Por nuk u harrua t’u thuhet të pranishmëve që në votime të mos dalë veç i zoti i shtëpisë, por “burra e gra, mos e lini asnjë votë në shpi”. Janë ftuar edhe anëtarët e partive të tjera ta votojnë PDK-në.





Salihaj: Vetëm LDK-ja ka kulturë politike të udhëheqë shtetin



Komogllava ishte caku i LDK-së për të përmbushur ditën e dytë të fushatës. Një pjesë e banorëve patën rastin të dëgjojnë edhe konstatime.  “Ju e keni pasur kryetarin nga fshati juaj (Bajrush Xhemajlin) dhe mund të krahasoni kur është investuar më shumë në Komogllavë, kur ishte LDK-ja apo gjatë këtyre viteve të PDK-së”. Në këtë frymë foli edhe kandidati Adem Salihaj, i cili ktheu prapa shikimin ndër vite, duke ua kujtuar fshatarëve se dy të tretat e rrugëve janë shtruar në kohën e tij, sa ishte kryetar komune.

“Vetëm LDK-ja ka një kulturë politike të udhëheqë me shtetin, LDK-ja është parti që mund të krijojë shtet të mirëfilltë, andaj është koha të fillojmë të krijojmë vlera për të gjithë e jo të punohet vetëm për interesa të ngushta klanore”, është shprehur Salihaj. Ai ka premtuar se për projektet e reja do të bisedohet hapur me qytetarët dhe se ato nuk do të mungojnë. “Ne kemi udhëhequr më mirë me 17 milionë, për shtatë vjet, kurse këta të PDK-së as me 50 milionë euro nuk kanë bërë sa ne”, ka thënë Salihaj. Mirëpo për të ndryshuar këtë qeverisje Salihaj i ka përkujtuar të pranishmit se duhet të shkojnë te kutitë e votimit. “Nga aty fillon ndryshimi”, ka përfunduar Salihaj. Ndërkaq Sahit Krasniqi në emër të LDD-së ka bërë thirrje për të dalë në votime.

“Këto zgjedhje nuk janë për një vit, por për pesë vjet”, ka thënë Krasniqi në tentim për t`i motivuar votuesit potencialë.

E, lideri i LDK-së ka folur me gjakftohtësi duke e shprehur përkrahjen e plotë pa ekuivoke ndaj Salihajt.

”Ky është kandidat i LDK-së dhe ne  e mbështesim pa rezervë “, ka theksuar Mustafa duke reflektuar një “monolitet”partiak.

”Nuk është qëllimi që LDK-ja ta fitojë një kryetar në një komunë, por është qëllimi që të fillojnë ndryshimet”, është shprehur Mustafa duke ftuar edhe votuesit  e partive të tjera që nuk kanë votuar në raundin e parë, kësaj radhe ta votojnë LDK-në. Ai ka ritheksuar se LDK-ja është në fazën e përmirësimeve të gabimeve, ndaj ka motivuar fitoren eventuale të LDK-së edhe me faktin se Ferizaj duhet  të bëhet shembull i qeverisjes së mirë sot “që  nesër të bëhet model i qeverisjes së mirë për Kosovën “.

Edhe takimi i LDK-së u mbyll me ftesa të hapura ndaj qytetarëve që të dielën të dilet në votim sa më masivisht.

 

Komente (1)Shpërndaje artikullin

• 15:57Danimarka fiton “Eurovisionin”
• 22:30Kryengritësit sirianë marrin kontrollin ndaj hapësirave alavite
• 22:25Rama prezantohet në Vlorë
• 22:20Prizreni s’i ndal dot punimet në Prevallë
• 22:17Ish-lojtari i NBA-së theret me thikë
• 22:13Përmbytje në Kinë, 50 të vdekur
• 22:11Myslimanë të Bosnjës në frontin kundër Assadit
• 22:08Serbia mban 1243 eksponate të Muzeut të Kosovës
• 22:06CSKA Moska fiton titullin e Rusisë
• 22:05Ferguson kritikon Man. Cityn për shkarkimin e Mancinit