Importi nga Serbia dëmton prodhimtarinë në Kosovë

Prishtinë, 19 maj – Importi i pakontrolluar nga vendet e rajonit dhe mungesa e standardizimit për kabllo po dëmton perspektivën e investitorëve të Kosovës, në mesin e tyre edhe të fabrikës për prodhimin e kabllove “Proton Cable”. Kjo fabrikë ka kapacitet për mbulimin e tregut të Kosovës, Maqedonisë dhe të Shqipërisë, porse, sipas pronarëve të saj, e ka të vështirë t’i qaset edhe vetë tregut të Kosovës.

“Proton Cable” ka nisur punën në vitin 2010, ndërsa thonë se prodhimin e bëjnë me teknologjinë e fundit dhe më të sofistikuarën në rajon për kabllo dhe përçues elektrik për tension të ulët.

Drejtori i kësaj kompanie, Fatos Dida, në një konferencë për media ka thënë se mungesa e një standardizimi për kabllot është problemi kryesor që ata po ballafaqohen.

“Zakonisht çdo shtet i cakton standardet të cilat edhe mund të jenë të njëjta me ato që i aplikojnë shtetet e BE-së, por tek ne nuk janë të caktuara. Mungesa e standardizimit po bën që në Kosovë të futen kabllo që nuk i plotësojnë asnjë standard, e kjo po na dëmton”, ka thënë Dida.

Sipas tij, kabllot që po importohen ose janë duke u subvencionuar nga shtetet fqinje, ose nuk i përmbajnë standardet dhe janë jocilësore.

“Kabllot që importohen nga Turqia paguajnë 10 për qind dogana dhe prapë dalin me çmim më të lirë se ne, kur dihet që çmimi i bakrit është i njëjtë, meqë determinohet nga bursa ndërkombëtare.”

Dida ka thënë se fabrika që ai drejton do të vazhdojë t’u përmbahet standardeve që i ka vendosur, e që janë në përputhje me ato të Bashkimit Evropian. Ai ka thënë se momentalisht i kanë 15 punëtorë, pasi fabrika po punon me minimumin e kapacitetit.

“Shpresojmë që ne të rritemi në treg dhe të shtojmë kapacitetin tonë, në mënyrë që të krijohen edhe vende të reja të punës, pasi rritja e kapaciteteve nënkupton rritje të numrit të punëtorëve, apo katërfishimin e tyre”, ka thënë drejtori i “Proton Cable”.

Edhe kjo kompani është e pakënaqur me politikat e Qeverisë së Kosovës për prodhuesit. Prodhuesit, sipas tij, janë themeli i zhvillimit të një shteti, prandaj ata duhet të përkrahen duke iu krijuar kushte të mira të operimit.

“Ne nuk kërkojmë shumë nga Qeveria, por të jemi të barabartë me vendet e rajonit. Ne paguajmë doganë për lëndë të parë dhe paguajmë TVSH në kufi, elemente këto që na bëjnë të pafuqishëm t’i konkurrojmë vendet e rajonit, të cilët mund të dalin më lirë për shkak të mospagesës së doganës në lëndë të parë”, ka thënë ai.

Butrint Batalli, auditor i cilësisë për ngritjen e sistemeve menaxhuese për ISO standarde, ka thënë se deri më tani nuk është caktuar një standardizim për çështjen e kabllove dhe të gypave. Ai ka thënë se tashmë do të iniciohet që të bëhet një standardizim edhe sa u përket këtyre mallrave.

“Agjencia e Standardizimit merr standardet ndërkombëtare, i harmonizon ato dhe i bën standarde kosovare për një fushë të caktuar, pas një diskutimi publik. Jemi duke i shikuar mundësitë që të caktojmë edhe standardet për kabllo”, ka thënë Batalli, i cili është kryetar i komisionit teknik për metale, plastikë dhe elektrikë, i cili vepron në kuadër të Agjencisë Kosovare të Standardizimit. Ai ka thënë se duhet të ketë një laborator apo institucion i cili do të bënte kontrollin e cilësisë që importohet.

“Shpesh shitet një produkt dhe proklamohet që e plotëson një standard të caktuar, mirëpo në fakt ai nuk i plotëson ato standarde. Këto produkte shpesh kanë një çmim nën koston e prodhimit. Prandaj duhet të bëhet kontrolli i cilësisë së tyre”, ka thënë Batalli.

Komente (4)Shpërndaje artikullin

• ALL140.1
• MKD61.5
• USD1.30
• CHF1.25
• GBP0.87

• 18:21Interpol hedh poshtë kërkesën ruse për Browder-in
• 17:36Certifikohen 41 nënoficerë të FSK-së
• 17:26Balona paqeje në Kabul
• 17:13Presidentja Jahjaga priti kongresistin amerikan Robert Aderholt
• 17:02Arrestime masive të shqiptarëve në Plavë e Guci
• 16:55167 vjetori i lindjes së Naim Frashërit
• 16:37Sot - Dita Ndërkombëtare e fëmijëve të humbur
• 16:26Inspektorati po e mbikëqyrë zbatimin e ligjit për duhanin
• 16:18Incident në Shkup, një i plagosur
• 16:08Huliganët e Borussias dhe Bayernit përleshen në Londër (Video)