Bayerni kompleton finalen e "Championsit"

Madrid, 25 prill - Bayern Muencheni ka nxjerrë biletën për në finale të Ligës së Kampionëve, pasi të mërkurën mbrëma në "Santiago Bernabeu" mposhti Real Madridin pas një gjysmëfinaleje dramatike me rezultatin 3:1 pas penalltive. Portieri gjerman Manuel Neuer ishte hero i skuadrës bavareze ku priti dy penallti dhe madje të dy lojtarëve kyç të Realit, Cristiano Ronaldos e Ricardo Kakas. Penalltinë tjetër për Realin e humbi mbrojtësi Sergio Ramos.

Bayerni në finalen që do të zhvillohet në stadiumin "Allianz Arena" të Munihut do të përballet me Chelsean. Chelsea të martën mbrëma bëri befasi duke e eliminuar në gjysmëfinale Barcelonën.

Bayerni do të jetë skuadra e parë që nga viti 1984 që do ta luajë një finale të Evropës në stadium të vet. Së fundi këtë e bëri Roma. 

Në të vërtetë gjërat për Bayernin nisën shumë keq në sfidën e së mërkurës. Qysh pas 14 minutave Real Madridi përmbysi disavantazhin prej 2:1 që pati nga ndeshja e parë me anë të dy golave të Cristiano Ronaldos. Ronaldo golin e parë e shënoi nga penalltia në minutën e gjashtë, ndërsa të dytin e realizoi në minutën e 14-të pas një asistimi të Mesut Oezil.

Mirëpo në minutën e 27-të të ndeshjes holandezi Arjen Robben realizoi nga penalltia për Bayernin, duke barazuar shifrat pas dy ndeshjeve në 3:3.

Me gjithë rastet e shumta gjatë ndeshjes, rezultati pas 90 minutave në "Santiago Bernabeu" mbeti 2:1 dhe kështu pas dy ndeshjeve shifrat mbetën baras 3:3. Në lojën shtesë asnjëra skuadër nuk arriti të realizojë, kështu që finalisti u përcaktua në ekzekutim të penalltive. 

Dy penalltitë e para të Realit të ekzekutuara nga Cristiano Ronaldo e Ricardo Kaka i priti portieri i Bayernit, Manuel Neuer, derisa për Bayernin realizuan David Alaba e Mario Gomez. Më pas i erdhi rasti portierit të Realit, Iker Casillas, që priti dy penalltitë e radhës të Bayernit të ekzekutuara nga Toni Kroos e Philipp Lahm. Mirëpo, Reali në penallti shënoi vetëm një herë me anë të Xabi Alonsos, derisa mbi portë gjuajti Sergio Ramos.

Penalltinë vendimtare për Bayernin e shënoi mesfushori Bastian Schweinsteiger.

Bayerni në finalen e 19 majit do të luajë pa tre lojtarë titullarë - Luiz Gustavon, Holger Badstuberin e David Alaban - të cilët janë të suspenduar shkaku i kartonëve.







B O X ****



Real Madrid - Bayern M.    2:1 (3:3) pen. 1:3



(Ronaldo 6' pen., 14' - Robben 27' pen.)



Real Madrid: Casillas, Arbeloa, Ramos, Pepe, Marcelo, Alonso, Khedira, Di Maria (Kaka), Oezil (Granero), Ronaldo, Benzema (Higuain)



Bayern M.: Neuer, Lahm, Boateng, Badstuber, Alaba, Gustavo, Schweinsteiger, Robben, Kroos, Ribery (Mueller), Gomez





Në kllapa është shënuar rezultati i përgjithshëm

Komente (2)Shpërndaje artikullin

• 19:14Haradinaj optimist për zbatimin e marrëveshjes
• 18:47Gati gjysma e britanikëve duan dalje nga BE-ja
• 18:37Shikoni si i argëton babai katërnjakët e tij (Video)
• 18:24Messi, profesionist edhe në reklamim
• 18:14Torresi në zbritje, Chelsea kërkon vetëm 20 milionë funte
• 18:03Nadal dhe Serena, mbretër të Romës
• 17:35The Telegraph: Marrëveshja Rama- Blair mund të kushtojë miliona funte
• 17:26Bonot e thesarit shqiptar në minimum historik
• 17:21Fituesja e Eurosongut, origjinë nga familja mbretërore britanike
• 16:57Kina synon rritjen e bashkëpunimit me Indinë