Thaçi dhe kreu i BIM porositin: Të mos dilet në protestë

Shkup, 7 mars – Ministria e Brendshme e Maqedonisë po vazhdon të ndjekë thirrjet që ditëve të fundit po postohen nëpër rrjetet sociale për organizimin e protestave gjatë ditës së nesërme dhe të shtunën që vjen. Nga MBP-ja u bëhet ftesë të gjithë aktorëve të shoqërisë, përfshirë këtu edhe mediat dhe OJQ-të, që në mënyrë aktive të kyçen dhe të japin kontributin e tyre për uljen e tensioneve. Nëpërmjet një komunikate me shkrim, MPB-ja ka apeluar në qytetarët për uljen e tensioneve. Policia njoftoi se do të marrë të gjitha masat dhe do të dënojë të gjithë aktorët që do të shkaktojnë ose do të marrin pjesë në incidente. Gjithashtu në reagimin me shkrim të MPB-së thuhet se qytetarët që kanë planifikuar të marrin pjesë në protesta, nuk guxojnë të lejojnë që të manipulohen në çfarë do qoftë skenari pasi përgjegjësia do të bie në kurriz të tyre.

Edhe kreu i Partisë Demokratike Shqiptare, Menduh Thaçi iu ka bërë thirrje simpatizantëve të partisë së tij që të mos dalin në protestat e paralajmëruara për ditët në vijim. Sipas tij, nuk është koha e protestave, andaj nuk duhet bërë pre e caqeve të ndryshme. Thaçi tha se shqiptarët nuk duhet të bëhen ‘mish për top’. Këto deklarata Thaçi i ka bërë mbrëmë në mitingun e PDSH-së në Çair, ku ka bërë promovimin e kandidatit të saj për komunën e Çairit, raporton Alsat-M.

“Sinqerisht ju lus, më besoni mua, nuk ka nevojë tani për protesta. Nuk ka nevojë, ju lutem, duan të përdorin shqiptarët si ‘mish për top’, këtë e bën BDI-ja dhe këtë e bën Ali Ahmeti. Duan të na habisin mendjen prej këtij përcaktimi që do të jetë gjithëkombëtar. Prej datës 24 duan të na hamendësojnë që të orientohemi në një aktivitet tjetër. A ka sqarim më të madh dhe më të sinqertë për ligësinë e këtyre protestave para ambasadës së Serbisë, që organizoi Fazli Veliu. Pse i organizoi, pse ata e rrëzuan lapidarin e UÇPMB-së në Preshevë, po as një lapidar nuk kanë arrit në asnjë qytet shqiptarë për këto 10 vjet ta vendosin”, deklaroi Menduh Thaçi, kryetar i PDSH-së.

Bashkësia Fetare Islame në Maqedoni iu bëri apel qytetarëve që të mos bëhen viktimë e manipulimeve që kanë për bazë skenarë të errët politikë. Nga BIM gjithashtu bëjnë thirrje që të mos keqpërdoren objektet fetare si pikënisje e protestave, të cilat janë paralajmëruar për nesër, sërish në rrjetet sociale, pas faljes së namazit të xhumasë.

Kreu i BIM, Sulejman Rexhepi pas takimit me ambasadorin amerikan në Shkup, Paul Wohlers, deklaroi se nuk e përjashton mundësinë e anulimit të protestave për Burmali Xhaminë, të paralajmëruara më 15 mars.

“Gjatë bisedave të deritashme, angazhimeve të deritashme që kemi edhe nga subjekti politik shqiptar që participon momentalisht në qeveri, ka gjasa që BFM ato protesta t’i shtyjë ose t’i anulojë, varësisht prej rezultateve që do të arrijmë brenda këtyre dy ditëve të fundit... Çështja e Burmali Xhamisë të zgjidhet në institucionet kompetente të RM-së dhe patjetër të gjendet një rrugëdalje fatlume që do të jetë në interes të të gjithë qytetarëve të RM-së. Nuk guxon assesi një bashkësi fetare të jetë favorit dhe në dëmin apo në kurrizin e bashkësive tjera fetare”, deklaroi  Sulejman Rexhepi.

Rexhepi ritheksoi qëndrimin e mëhershëm të BIM edhe për protestat e paralajmëruara në opinion, duke iu bërë thirrje besimtarëve myslimanë që të mos bien pre e manipulimeve apo provokimeve. Takimi i Sulejman Rexhepit me ambasadorin amerikan zgjati rreth dy orë. 

Komente (2)Shpërndaje artikullin

• 22:49Bayern - kampioni i ri i Evropës
• 22:40Vatikani shenjtëron një prift të njohur për luftën kundër mafias
• 22:36Paris: Ushtari sulmohet me sqepar
• 22:34Fieri heq simbolet e partive politike në qendër të qytetit
• 22:25“Ruby” gënjeu hetuesit
• 22:17Telefoni “po i ul kokën shoqërisë”
• 22:14Luftime në qytetin strategjik sirian të Qusairit
• 22:08Gashi fiton kryemeçin e mbrëmjes "Gani Muhaxheri"
• 22:00Vazhdon bilanci negativ tregtar
• 21:57Vejusha e zezë’ shpërthen veten, 11 të plagosur