Shqipja “përparon” te maqedonasit

Shkup, 1 gusht - Interesimi për të mësuar gjuhën shqipe shfaqet nga një numër i konsiderueshëm i maqedonasve, qoftë kjo nga ana e studentëve në Katedrën e gjuhës shqipe, por edhe nëpër kurse private. Kësaj i shtohen edhe paraqitjet e fundit të të interesuarve gjatë tre vjetëve të fundit nëpër Qendra për gjuhë, por që i mungon formimi i një grupi që të fillohet me punë. “Unë personalisht ligjëroj në Qendrën e gjuhëve ‘Temsa’ dhe kam kolege, e cila është profesioniste për mësimin e gjuhës shqipe, por interesi i qytetarëve për mësimin e gjuhës shqipe mbetet relativisht i vogël. Ka disa të rinj që paraqiten nëpërmjet telefonit dhe tregojnë interes për ta mësuar gjuhën shqipe, por assesi të formohet një grup dhe të fillojnë me kursin, nga se për fillimin e kursit doemos nevojitet të formohet grup nga pesë persona”, thonë në “Temsa”.

Nga Qendra për gjuhë ‘Delfin’ në Manastir thonë se gjatë viteve të fundit ka pasur rreth 60 të interesuar për të mësuar shqipen.

“Ka pasur mjaft të interesuar për kursin e gjuhës shqipe nga ana e maqedonasve në qytetin e Manastirit, por deri tani nuk është formuar ndonjë grup. Vetëm gjatë 3-4 vjetëve të fundit janë interesuar mbi 60 persona për të mësuar gjuhën shqipe, por nuk kam pasur hapësirë të objektit ku do të mbahet ky kurs, pasi që kam vetëm dy klasa ku mbahen edhe katër kurse të gjuhëve të ndryshme, si dhe nuk kam mundur të gjej ndonjë profesor adekuat për të ardhur deri këtu e të ligjërojë gjuhën shqipe. Interesin për mësimin e gjuhës shqipe e kanë shfaqur si të rinjtë ashtu edhe më të moshuarit e posaçërisht biznesmenët e mëdhenj. Pa dyshim se në një të ardhme të afërt do të angazhojmë profesor dhe do të gjejmë objekt për ndjekjen e kursit në gjuhën shqipe”, tha Nikolla Shulevski, nga qendra e gjuhëve të huaja në Manastir për gazetën Zhurnal plus.

Ndërkohë, profesori i Katedrës për gjuhë shqipe, Avzi Mustafai përmend interesin e madh të studentëve maqedonas për mësimin e gjuhës shqipe, por njëkohësisht zbuloi se arsyeja themelore për këtë është nevoja e avancimit sa më të lehtë në punë.

“Mendoj se mësimi i gjuhës shqipe te maqedonasit duhet të shikohet në dy relacione. Relacioni i parë ka të bëjë me atë se ata e mësojnë gjuhën shqipe për shkak të punësimit dhe, relacioni tjetër, se nuk mësohet gjuha shqipe nga ata të cilët kanë nevojë të komunikojnë me bashkëqytetarët shqiptarë. Numri më i madh i studentëve që studiojnë gjuhën shqipe për përkthim dhe interpretim kryesisht janë nga Maqedonia Lindore, që domethënë se ata e shikojnë mësimin e gjuhës shqipe si nevojë punësimi. Të paktë janë  studentët nga Maqedonia Perëndimore (të banuar me shumicë shqiptare) që studiojnë shqipen, ndonëse ata posedojnë një fond bukur të mirë të gjuhës shqipe, numri është shumë i paktë. Unë mendoj se ka ardhur koha që ne nëpërmjet mësimit të gjuhëve të afrohemi dhe kuptohemi si bashkëqytetarë, që në të ardhmen do të jetë kusht i patjetërsueshëm i të dy komuniteteve t’i mësojnë dhe t’i flasin gjuhët në mënyrë reciproke”, deklaroi profesori Avzi Mustafa.

 

Komente (1)Shpërndaje artikullin

• 22:35Biglia i lumtur që zgjodhi Lazion
• 22:33Hamsik nuk largohet nga Napoli
• 22:31Juve nuk e shet Marchision
• 22:30VV i përgjigjet diplomatit amerikan, Edward Joseph
• 22:26Kramer beson se Mavraj do të mbetet në Furth
• 22:20Itali: 16 miliardë në vit nga ekomafia
• 22:12Del Bosque kërkon më shumë gola nga Spanja
• 22:09Zviceranët e kanë trashëguar pasurinë
• 21:59Sioni insiston për Beg Feratin
• 21:55"Dielli TEB Open": Hasani-Bytyqi triumfojnë në çifte