Qeveria ndërton “Dell arenën” në vend të sheshit “Ibrahim Rugova”

Prishtinë, 1 prill (KD) - Qeveria e Kosovës ka vendosur që të rialokojë 23 milionë euro nga projekti i termocentralit “Kosova e Re” për të financuar ndërtimin e një arene sportive në qendër të Prishtinës, përballë ndërtesës së Qeverisë dhe Kuvendit të Kosovës, në vendin ku sot gjenden rrënojat e hotelit “Union”, të djegur tre vjet më parë, shkruan sot gazeta Koha Ditore.

Projekti, ndërtim ekstravagant që ka dukjen e një tende gjigante, tashmë është miratuar, dhe ndërtimi, sipas një burimi të sigurt nga Qeveria, do të nisë qysh gjatë muajit prill, sapo të përmbyllen procedurat ligjore për anulimin e vendimeve të Komunës së Prishtinës për hapësirën në fjalë ku do të ndërtohet qendra dhe të rrënohet ajo që ka mbetur nga hoteli “Union”.

KK i Prishtinës tashmë e ka miratuar një plan, sipas të cilit hapësira në fjalë do të rregullohet në park që duhet të bartë emrin Ibrahim Rugova, por burime nga Lidhja Demokratike e Kosovës (LDK) kanë thënë se partia më e madhe opozitare do të duhej t’ia lëshonte udhën projektit të ri të Qeverisë për arsye të shumta, në mesin e të cilave duket se kryesorja është se projekti i arenës sportive ka përkrahjen ndërkombëtare.

Madje, në shenjë falënderimi për përkrahjen perëndimore, posaçërisht atë amerikane, ka qenë vetë kryeministri i Kosovës, Hashim Thaçi, ai që ka vendosur edhe për emërtimin e arenës së planifikuar, e cila thuhet se do të quhet “Dell arena”, në emër të ambasadorit të SHBA-së, i cili këtë verë e përmbyll mandatin e tij trevjeçar në Kosovë.

“Plani është që ndërtimi të përmbyllet sa më shpejt, ashtu që koktejin lamtumirës për ambasadorin Dell, që kryeministri planifikon ta organizojë më 4 korrik, të mund ta mbajmë pikërisht në arenën e re”, ka thënë një burim nga Qeveria, që ka preferuar të mos i përmendet emri.

Sipas burimit, tashmë është përzgjedhur edhe ndërtuesi i objektit madhështor, edhe pse procedurat e tenderimit zyrtarisht pritet të fillojnë javën që vjen.

“’Dell arena’ do të ndërtohet nga ndërmarrja ‘Mabetex’, meqë ajo garanton se puna do të përmbyllet deri në fund të qershorit, dhe, në fund të fundit, kjo kompani edhe është autore e planit ideor dhe e projektit, kështu që ata edhe janë më të përshtatshmit për ta ndërtuar objektin”, ka thënë burimi, që është një prej gjashtë zëvendësve të kryeministrit.

 

Tenda e projektuar për Gadafin

 

Projekti për “Dell arena” është hartuar nga “Mabetex” qysh para dy vjetëve, me porosi të kryetarit të atëhershëm të Xhamhirisë së Libisë, Muamer el Gadafi, i cili vitin e kaluar është vrarë nga kryengritësit në Libi, të cilët edhe ia rrëzuan pushtetin e tij 40-vjeçar.

Sidoqoftë, thuhet se Gadafi, në një takim me zëvendëskryeministrin e tanishëm të Kosovës, Behgjet Pacolli, njëkohësisht edhe pronar i “Mabtexit”, ishte shprehur i gatshëm që edhe formalisht ta njihte pavarësinë e Kosovës, sapo të përfundonte ndërtimi i tendës betonike për të. Por, kryengritja në Libi e pengoi realizimin e këtij plani, që tani ka gjetur vend në qendër të Prishtinës.

Zëvendëskryeministri i Kosovës, Behgjet Pacolli, i kontaktuar me telefon në lidhje me projektin e ri, është shprehur tejet i shqetësuar me faktin që gazeta ka marrë vesh për projektin kaq shpejt, por ka thënë se ai do ta ndërtojë këtë qendër sportive shumë shpejt dhe shumë mirë.

“Unë di të ndërtoj bukur. Kjo ndoshta i pengon dikujt. Por unë di ta bëj këtë, dhe ju lutem, më lejoni ta bëj këtë, sepse Kosova e meriton një tendë të tillë të bukur, me një emër të tillë të bukur”, ka thënë Pacolli, duke insistuar se “Mabetex” “nuk do të përfitojë asgjë prej kësaj pune”.

“Unë edhe pasurinë time jam në gjendje ta shkrij, vetëm ta ndërtoj Kosovën e bukur”, ka thënë ai, derisa e ka pranuar se Qeveria do t’i mbulojë shpenzimet e projektimit dhe të ndërtimit të “Dell arena”.

 

Mustafa nuk flet, Daci propozon kompromisin “Ibrahim Dell arena”

 

I padisponuar të flasë ka qenë të dielën kryetari i Komunës së Prishtinës, Isa Mustafa, duke insistuar se kjo nuk ka asnjë lidhje me te.

“Ju lutem, keni kujdes se çka shkruani, sepse të pavërtetat shpesh po kuptohen si të vërteta, dhe kjo mua më ka dëmtuar në të kaluarën, sidomos kur këso fjalësh kanë dalë prej partisë sime”, tha Mustafa.

Një reagim është dëgjuar në lidhje me projektin nga kreu i Lidhjes Demokratike të Dardanisë, Nexhat Daci, i cili ka lavdëruar projektin e ri, por ka thënë se emërtimi ndoshta duhet të jetë më ndryshe.

“Unë, si akademik, njohës i historisë dhe i politikës, e kuptoj arsyen për këtë emërtim, por ju them se akademik Daci po të ishte në krye të vendit, do ta zgjidhte këtë punë shumë më mirë, ashtu që të mos konfliktohemi as me miqtë ndërkombëtarë, të cilët shpesh na e kanë dashur të mirën, e as të shkelim mbi historinë tonë dhe personalitetet tona”, ka thënë Daci, duke propozuar që Qendra të quhet “Ibrahim Dell arena”.

Një propozim i tillë është kundërshtuar edhe nga Qeveria, edhe nga partitë e tjera opozitare, sidomos nga “Vetëvendosja”. Madje, Glauk Konjufca i “Vetëvendosjes” ka deklaruar se bëhet fjalë për një komplot të kryeministrit Thaçi dhe të liderëve të tjerë, përfshirë opozitarët nga LDK-ja dhe AAK-ja, dhe qëllimi është përgatitja e logjistikës për përballje me pakënaqësitë sociale dhe politike që pritet të shpërthejnë për shkak të qeverisjes së keqe dhe koncesioneve ndaj Serbisë.

“Ata po e ndërtojnë jo një qendër sportive, por një burg, një kamp përqendrimi, në të cilin do të na fusin neve, që përfaqësojmë idealet dhe pritjet e popullit, i cili është i zhgënjyer me punën dhe tradhtitë që po ua bën kjo qeveri”, ka thënë Konjufca. Por, ai ka pasur një porosi për qeveritarët: “Kot e keni, se jemi shumë më shumë se që mund të na zërë kjo tendë e shkretë”, ka thënë ai, duke pyetur gazetarët më pas nëse e dinë se për sa persona është tenda që do të ndërtohet.

 

Thaçi i relaksuar

 

Të dielën, kryeministri Hashim Thaçi, i relaksuar dhe në shoqëri të ambasadorit amerikan Christopher Dell, ka shëtitur nëpër qendër të Prishtinës, ku ka inspektuar vendin në të cilin do të ndërtohet “Dell arena”.

“Jam i lumtur që Kosova, përkundër disa zërave të frustruar, di të falënderojë miqtë e saj, të cilët i qëndrojnë pranë në momentet më të vështira të historisë”, ka thënë Thaçi, duke shtuar se “një arenë sportive është gjëja më e vogël që ne mund të bëjmë për Amerikën dhe Perëndimin”.

Vetë ambasadori Dell ka preferuar të mos flasë shumë para medieve, duke deklaruar shkurt se Kosova është shtet i pavarur dhe Qeveria e Kosovës ka mandatin, kapacitetet, vullnetin dhe vizionin për t’i marrë vetë vendimet e duhura. Aprililililililili

 

Komente (23)Shpërndaje artikullin

• 20:13Gjibraltari, anëtar i ri i UEFA-s
• 20:07Kosova, model i bashkëjetesës fetare
• 19:58MPMS jep 30 mijë euro për luftimin e rriqrave
• 19:48Interi shkarkoi trajnerin Stramaccioni
• 19:43Parandalohet rrëmbimi i avionit në qiellin britanik
• 19:42Ushtria franceze ndërhyn në Niger
• 19:40Gjukanoviq lavdëron Serbinë e Kosovën
• 19:31Sulmohet kompleksi i OKB-së në Kabul
• 19:28Isa ju premton mbështetje hendbollistëve të Prishtinës
• 19:14Mourinho, 250 mijë funte në javë te Chelsea!