Clinton – Ashton: Kosova në BE me kufijtë e tashëm

Prishtinë, 31 tetor – S’ka ndryshim kufijsh dhe  e ardhmja e Kosovës është në Bashkimin Europian, janë mesazhet kryesore të dy zyrtareve të larta të SHBA e të BE, Hillary Clinton e Catherine Ashton, të cilat arritën mbrëmë në Kosovë, në turin e tyre ballkanik.  Pas takimeve të ndara të sekretares amerikane të Shetit, Hillary Clinton dhe përfaqësueses së lartë për Politikë të Jashtme të BE, Catherine Ashton, me presidenten e Kosovës, Atifete Jahjaga e kryeministrin Hashim Thaçi, zyrtaret e larta nga SHBA e BE dhe kryeministri i Kosovës mbajtën pak çaste më parë  një konferencë të përbashkët para gazetarëve.

Kryeministri Hashim Thaçi duke shfaqur kënaqësinë që kishte pritur këto zyrtare të larta, ia kujtoi sekretares Clinton ardhjen e saj para 13 vjetësh në Kosovën me plagët e njoma të luftës, me shumë të vrarë e shkatërrime që tmerronin, duke e krahasuar me këtë sot në Kosovën e pavarur, shtet sovran dhe të përparuar. Për gjithë këtë ai i shfaqi mirënjohjen SHBA, duke e quajtur vepër të përbashkët. Por s’harroi të përmend se kjo nuk është ende Kosova e ëndrrave, që aspirojnë Bashkimin Europian  dhe integrimin në NATO. Po ashtu tha se në këtë rrugë  presin shumë punë, ndër to luftimi i korrupsionit dhe krimit të organizuar dhe krijimi i mirëqenies për qytetarët.

Ndër sfida më kryesore Thaçi përmendi gjendjen në veri dhe integrimin e serbëve në shtetin e tyre të Kosovës. Ai tha se do t’ju shërbejë të gjithë qytetarëve të vendit pavarësisht nga përkatësia e tyre etnike e fetare. Por, në këtë synim shfaqen pengesa prania  strukturave ilegjitime e të sigurisë të Serbisë. Por u zotua se do të ndjek i palëkundur rrugën e dialogut me Serbinë, si rrugë të vetme për normalizimin e marrëdhënieve me këtë vend. Në këtë kontekst ai theksoi se ora e historisë nuk kthehet pas dhe se territori i Kosovës është i pacenueshëm. Për normalizimin e marrëdhënieve tha se përbën interes për Kosovën, për Serbinë dhe për rajonin.

Sekretarja amerikane e Shtetit Hillary Clinton, jo pa emocione rikujtoi takimin e parë me refugjatët e sfilitur të Kosovës, ndër të cilët kishte parë krenarinë e popullit, theksoi se tani  ndihet e lumtur që sheh një Kosovë e cila ka bërë progres të paimagjinueshëm. Ajo para gazetarëve përsëriti se në Beograd kishte përcjellë përcaktimet amerikane për mbështetjen e aspiratave evropiane të Serbisë e të Kosovës dhe të vendeve të tjera të Ballkanit, si një rrugë që siguron prosperitet e paqe për të gjithë. Po ashtu bëri thirrje për vazhdimin dhe avancimin e dialogut ndërmjet Serbisë e Kosovës dhe mbështeti hapin e Thaçit për t’u takuar me Daçiqin, si një ndërmarrje të guximshme duke pasur para sysh historinë e të kaluarës. Po ashtu mbështeti presidenten Jahjaga, për të cilën u shpreh se ajo ka prezantuar me sukses Kosovën në botë dhe ka përmirësuar imazhin e vendit.

Sekretarja Clinton i bëri thirrje Beogradit që të zbatojë marrëveshjet e arritura me Kosovën dhe të punojë për marrëveshje të tjera në interes të t dy vendeve. Po ashtu u bëri thirrje serbëve të veriut që të integrohen në shtetin e tyre, Kosovë, si e ardhme e tyre, dhe që bashkërisht të luftojnë për sundimin e ligjit dhe kundër krimit të organizuar. “Kufijtë e Kosovës janë vënë për gjithmonë dhe ata nuk do të ndryshojnë”, u shpreh ajo. Thaçi po vepron si kryeministër i të gjithë qytetarëve të Kosovës, vendit që meriton integrimin në Europë. Ajo u zotua se SHBA do t’i qëndrojë Kosovës pranë  deri sa të përmirësojë qeverisjen dhe t’i kalojë pengesat me Serbinë.

“Presim me kënaqësi ardhjen në BE edhe të Serbisë edhe të Kosovës. Rruga s’do të jetë e lehtë, por është e mundshme”, tha përfaqësuesja e lartë e BE-së, Catherine  Ashton. Ajo përmendi detyrat që duhet të kryejnë vendet aspiruese për në BE: sundimi i ligjit, të drejtat e njeriut...

Ashton ripërsëriti se presin me kënaqësi dialogun Serbi-Kosovë, që s’do të jetë i lehtë as për njërin vend, as për tjetrin duke pasur historinë e marrëdhënieve midis tyre. Por dialogu është i domosdoshëm për të kapërcyer dallimet, kurse serbëve të veriut u bëri thirrje të ndihen pjesë e Kosovës.

Sikurse edhe sekretarja Clinton, edhe Ashton  përgëzoi kryeministrin Thaçi për guximin që shfaqi duke u takuar me kryeministrin e Serbisë, Ivica Daçiq, pa harruar që këtë atribut t’ia njohë edhe kryeministrit serb. Ajo shfaqi bindjen se takime të tilla do të ketë sërish dhe së shpejti.

 

Komente (11)Shpërndaje artikullin

• 13:25Këngëtarja serbe fyen shqiptarët në Eurosong
• 13:14Zbatimi i ligjeve siguron edhe ushqim të shëndetshëm
• 13:06Lajiq: Bisedimet teknike për telekomunikimin, pas 22 majit
• 12:51LDK: Keqpërdorime dhe keqmenaxhime në kulturën e Gjilanit
• 12:24MPJ e Gjermanisë: Westerwelle do të kërkojë zbatim të shpejtë të marrëveshjes
• 12:00Një asteroid masiv kalon pranë tokës më 31 maj
• 11:45SHBA-ja kritikon Rusinë për armatosjen e Asadit me raketa
• 11:41Vritet një komandant lokal i policisë afgane
• 11:38Mbi 3 600 projekte presin mbështetjen e Ministrisë së Bujqësisë
• 11:26Trupat amerikane ushtrojnë për misionin në Kosovë