Veç një “mur kinez” mund ta ndalë kontrabandën Kosovë - Shqipëri

Tiranë, 22 tetor - Zëvendësministri i Punëve të Brendshme i Kosovës,  Ismet Ibishi, ka theksuar se po bëhen përpjekje për  një kontroll edhe nga ajri me patrulla të përbashkëta, në ato zona ku mjetet e tjera nuk mund të patrullojnë, për një luftë akoma më efikase ndaj krimit të organizuar e kontrabandës në kufirin Shqipëri - Kosovë. Ky pohim i numrit dy të Ministrisë së Brendshme të Kosovës është bërë në një takim që ky i fundit ka zhvilluar me drejtorin e Policisë së Shtetit të Shqipërisë, Hysni Burgaj, shkruan sot “Koha Ditore”. Zv.ministri i Brendshëm i Kosovës, Ibishi, në javën që sapo lamë pas zhvilloi një vizitë dyditore në Tiranë ku shoqërohej dhe nga drejtues dhe ekspertë të strukturave të ndryshme të Policisë së Kosovës. Gjatë takimit të zhvilluar  me  drejtorin e Policisë shqiptare, Burgaj, bashkëbiseduesit evidentuan bashkëpunimin shumë të mirë që ekziston mes Policisë shqiptare dhe asaj të Kosovës, si dhe theksuan nevojën e intensifikimit të mëtejshëm të këtij bashkëpunimi, duke konfirmuar vullnetin maksimal për të bashkëpunuar në të gjitha drejtimet. “Bashkëpunimi dhe shkëmbimi i eksperiencës ndërmjet dy policive ka qenë në nivele shumë të larta dhe e veçoj këtë si bashkëpunimin më të mirë në rajon, si dhe shpreh dëshirën dhe vullnetin maksimal për të konsoliduar dhe më tej këtë bashkëpunim në të gjitha fushat”, u shpreh Burgaj. Gjatë bisedës, Burgaj, duke e vlerësuar si një arritje madhore për vendin procesin e liberalizimit të vizave dhe marrjen e statusit të vendit kandidat, evidentoi faktin se një kontribut të çmuar në këtë drejtim kanë dhënë dhe përpjekjet mjaft të mëdha të Policisë së Shtetit dhe treguesit e arritur prej saj. Po ashtu Burgaj i garantoi Ibishin se Policia e Shtetit të Shqipërisë është e gatshme ashtu, sikundër deri tani që të ofrojë gjithë bashkëpunimin e asistencën e nevojshme për çështjet me interes dypalësh, si dhe në kuadër të procesit të liberalizimit të vizave të Kosovës dhe për integrimin e plotë të saj. Gjatë këtij takimi u evidentua gjithashtu bashkëpunimi shumë i mirë që ekziston në fushën e menaxhimit dhe kontrollit të kufirit, ku aktualisht policitë e të dy vendeve kryejnë edhe patrullime të përbashkëta në këtë kuadër. Zv.ministri i Punëve të Brendshme i Kosovës u ndal në mënyrë të veçantë dhe në iniciativën e ndërmarrë nga Ministria e Punëve të Brendshme për krijimin e një force rezervë për të menaxhuar situatat e emergjencës. Ibishi theksoi se:“Forca aktive e policisë është e nevojshme të jetë e përqendruar në përmbushjen e detyrave të saj të rregullta, ato detyra të cilat janë prioritare për të. Prandaj, doli si domosdoshmëri krijimi i një force rezervë për menaxhimin e emergjencave, e cila do të jetë e gatshme për çdo lloj situate. ”Duke vlerësuar tepër pozitivisht këtë iniciativë, Burgaj bëri një ekspoze të shkurtër të hapave të ndërmarrë nga vendi ynë për përballimin e situatave të tilla.“Aktualisht ne kemi ligjin për emergjencat civile, planin kombëtar të emergjencave civile, si dhe planin e veprimit operacional, në kuadër të të cilit gjatë emergjencave aktivizohen të gjithë strukturat e nevojshme. Po ashtu në rast emergjencash funksionon dhe shtabi i emergjencave veprimtaria e të cilit është e rregulluar me ligj” – theksoi Burgaj. Në përfundim të takimit, drejtori i përgjithshëm i Policisë së Shtetit dhe zv.ministri i Punëve të Brendshme të Kosovës, duke rikonfirmuar dhe një herë gatishmërinë për intensifikimin e mëtejshëm të bashkëpunimit, theksuan faktin se nuk duhet të ketë kufij në luftën kundër krimit. Ky takim do të pasohet dhe nga takime të tjera në nivel ekspertësh të fushave të ndryshme, me qëllim shkëmbimin e eksperiencave në fushën e rekrutimeve, trajnimeve, legjislacionit etj. Krahas tri pikave kufitare Kosovë - Serbi, edhe Vërmica në kufirin Kosovë - Shqipëri, hyn në mesin e vendkalimeve kufitare ku bëhet më së shumti kontrabandë. Ndërkohë kufiri Shqipëri - Kosovë është shndërruar në një nyjë të kontrabandës së mallrave e trafiqeve, kryesisht përmes kufirit të gjelbër, por edhe të pikëkalimeve kufitare. Në kufirin e gjelbër, si për pikëkalimit kufitar ekzistojnë dy rrugë këmbësorie që shërbejnë për kontrabandë, ku njëra shërben për kontrabandën e gjësë së gjallë (viçave hormonalë), ndërsa tjetra shërben për mallra të ndryshëm, duke përfshirë edhe ato të akcizës së cigareve, kafes, pijeve alkoolike, etj. Ndërkohë që kontrabandë realizohet edhe në fshatin Pogaj përmes kufirit të gjelbër, kryesisht ditëve të hëna dhe të premte, si dhe  përmes Liqenit të Fierzës në Morin, në Shishtavec, Qafë-Prushi e Qafë-Morinë. Trafiqet dhe kontrabandën e mallrave në kufirin Shqipëri - Kosovë e kanë pranuar edhe drejtuesit më të lartë të Doganave të Shqipërisë e të atyre të Kosovës, madje njëri prej tyre, pikërisht ish-drejtori i Shërbimit Doganor të UNMIK-ut, Paul Acda, pati deklaruar se vetëm një mur si ai kinez mund të parandalonte kalimet ilegale të mallrave në kufirin Shqipëri - Kosovë. ”Kontrabandistët janë si uji. Gjejnë nga një vrimë për të depërtuar dhe e vetmja mënyrë për të ndaluar kontrabandën përmes kufirit tokësor Kosovë - Shqipëri është të ndërtohet një mur, ashtu siç bënë kinezët”, deklaronte  ish-drejtori i Doganave të UNMIK-ut, Paul Acda. 

Komente (22)Shpërndaje artikullin

• 16:23Shpërthim i fuqishëm në Kabul
• 16:20Tjetër skenë e nxehtë në kanë
• 16:16Në aksident e pëson çiklisti
• 16:11Prifti dhe imami i Fushë Kosovës bashkë në varrezat ortodokse (Video)
• 16:06Rusia e Serbia nënshkruan një deklaratë mbi partneritetin strategjik
• 15:49Çeku kërkon shpalljen e kapaciteteve të plota operacionale të FSK-së
• 15:44Gabimet e zgjedhjeve kaluara të mos përsëriten në ato që vijnë
• 15:32Në ‘Ditën e Presidentit’ Jahjaga vuri kurorë në varrin e Rugovës
• 15:27Për vrasjen në Mitrovicë, 11 vjet burgim
• 15:12Faksimili i Planit Implementues të Marrëveshjes Kosovë-Serbi