Studentët paralajmërojnë protesta masive nëse shmanget Pakoja e Ahtisaarit

Mitrovicë, 2 shtator – Nëse dalin jashtë Pakos së Ahtisaarit gjatë bisedimeve, do të ketë protesta masive studentore për veriun e Mitrovicës, të ngjashme si ato të pranverës së vitit 1981. Kështu u tha në një konferencë për shtyp të mbajtur në Mitrovicë të dielën. Protesta masive do të organizohen nëse do të ketë farë ndarje apo në rast të dhënies së  ndonjë autonomie për veriun, kanë porositur studentët. Takimi është organizuar nga Këshilli i Rinisë i komunës së Mitrovicës, në bashkëpunim me organizatat studentore të Universitetit të Prishtinës - ‘Lëvizja Studentore për Reformë’ (LSR), ‘Vizioni Studentor’ (VS), ‘Unioni i Studentëve Proevropianë’ (USPE), ‘Organizata për Studim, Kritikë dhe Veprim’ (SKV), Këshilli i Studentëve të UP-së, dega në Mitrovicë, si dhe organizata studentore ‘Opinioni i Pavarur i Studentëve’ (OPS). Musa Damati, kryetar i Këshillit të Rinisë në Mitrovicë, paralajmëroi një vjeshtë me protesta në rast të cenimit të integritetit territorial të Republikës së Kosovës. “Këshilli i Rinisë i komunës së Mitrovicës dhe organizatat studentore paralajmërojnë Bashkësinë Ndërkombëtare dhe institucionet tjera relevante, se në qoftë se gjatë dialogut, që do të zhvillohet në Bruksel midis Kosovës dhe Serbisë, vjen deri te ndarja e  veriut të Mitrovicës, apo vjen deri te dhënia e çfarëdo statusi special për veriun e Mitrovicës, Këshilli i Rinisë i komunës së Mitrovicës, në bashkëpunim me organizatat studentore do të organizojnë protesta masive me të rinjtë e qytetit të Mitrovicës dhe me studentët e Universitetit të Prishtinës, të cilat do të mbahen në Mitrovicë, të ngjashme sikur ato të vitit 1981, në të cilat të rinjtë e qytetit të Mitrovicës, në bashkëpunim me studentët e UP-së do të organizohen bashkërisht dhe do ta tejkalojnë barrikadën e vendosur mbi lumin Ibër, duke depërtuar në veri të Mitrovicës. Në këtë mënyrë, të rinjtë e Mitrovicës dhe organizatat studentore do ta mbrojnë çdo cep të Republikës së Kosovës, Mitrovicën - Jerusalemin e Republikës së Kosovës, dhe tokën e të parëve tanë”, tha Damati.

Irfan Veseli, nga ‘Unioni i Studentëve Proevropianë, shprehu përkrahje për mbajtjen e protestave në rast të cenimit të territorit të Kosovës, duke thënë se studentët kanë ditur të bëjnë kthesa historike në çdo vend. Edhe Durim Jasharaj, nga Organizata për Studim, Kritikë dhe Veprim tha se janë shumë kushte që Serbia duhet t’i plotësojë para çdo negociate me të.

“Serbia duhet të kërkojë falje për krimet e luftës, duhet t’i dorëzojë në Gjykatën Ndërkombëtare krejt kriminelët e luftës, Serbia duhet të na kthejë fondin pensional dhe të gjitha gjërat e grabitura, si dhe duhet ta ndryshojë kushtetutën e saj, në të cilën shkruan se Kosova është pjesë e territorit të Serbisë. Andaj, kur të gjitha këto t’i ketë bërë Serbia, atëherë mund të themi se është bërë e aftë dhe e denjë për të biseduar ne me të”, theksoi Jasharaj.

Lidhur me rezolutën e miratuar më 10 maj të këtij viti, e cila kushtëzon çfarëdo dialogu me Serbinë në rast se nuk kthehen të pagjeturit, ai kërkoi respektimin e saj.

Flamur Spahiu, përfaqësues i Vizionit Studentor, tha se studentët e UP-së, si shtresa më e çmuar e vendit në këtë kohë moderne, nuk do të qëndrojnë duarkryq, por do të jenë gjithmonë përkrahës të iniciativave të tilla, kur bëhet fjalë për integritetin territorial të shtetit të Kosovës. Ndërsa Nerimane Ferizi, përfaqësuese e Këshillit Studentor të UP-së në Mitrovicë, tha se është moment kyç që studentët të ngrenë zërin e tyre dhe të mos pranojnë vendime të dëmshme për vendin.

 

Komente (7)Shpërndaje artikullin

• 11:15Dhjetë premtimet e socialistëve për qeverisjen e Shqipërisë
• 10:58Grabitësit e 1 milion eurove në Greqi, ndoshta janë në Shqipëri
• 10:55"Ura me tri harqe" - Tirana, Prishtina e Tetova
• 10:51"Ringjallet" Koliqi në 110 vjetorin e lindjes
• 10:44Metroja më luksoze në botë
• 10:27Futuni në botën e çmendur të Picassos (video)
• 10:21Hummels i lumtur në Dortmund
• 10:05SHBA: Kushtetuta dhe ligjet e mbrojnë lirinë e fesë në Kosovë
• 10:04S’kthen kush kusur 1, 2 e 5 centë
• 10:03Juve dëshiron Tevezin