Qeveria nuk pranon zgjidhje dualiste për serbët e veriut

Prishtinë, 5 gusht- Qeveria e Kosovës ka vendosur t’i shpërfillë të gjitha strategjitë për integrimin e veriut që mund të bëhen nga qarqe të ndryshme ndërkombëtare, e që nuk janë në harmoni me Kushtetutën e Kosovës. Zëvendëskryeministri Hajredin Kuçi është zotuar të shtunën se serbëve të veriut nuk do t’u jepet asgjë më shumë se serbëve që jetojnë në anët e tjera të Kosovës.

“Zgjidhje dualiste për komunitetin serb në veri nuk do të ketë”, ka thënë ai për “Kohën Ditore”. Një nga koncesionet e parapara me planin e përfaqësuesve ndërkombëtarë, e që del jashtë Pakos së Ahtisaarit dhe Kushtetutës së Kosovës, është shtimi i numrit të vendeve të garantuara për serbët e katër komunave veriore.

Por Kuçi ka mohuar që Qeverisë t’i jetë kërkuar diçka e tillë.

Edhe sikur t’i kërkohej ditëve në vijim, ai ka thënë se përgjigjja e Qeverisë, do të jetë Jo. “Qëndrimi ynë është çdo zgjidhje, çdo ndryshim, dhe çdo veprim që mund të bëhet, të jetë në harmoni me Kushtetutën”, ka ripërsëritur ai.  Realisht, Kushtetuta është një akt që mund të ndryshohet! “Po, por ne nuk jemi të interesuar që ta ndryshojmë atë”, është përgjigjur Kuçi. Ai ka thënë se në këtë fazë të zhvillimeve politike në vend, është e pritshme që nga qarqe të ndryshme të politikës dhe të shoqërisë civile të lansohen lloj-lloj idesh e propozimesh për veriun, mirëpo Qeveria do të jetë e hapur me qytetarët për çfarëdo veprimi që do ta ndërmarrë në të ardhmen.

Burimet ndërkombëtare megjithatë kanë paralajmëruar se Qeveria e Kosovës, përveçse do të pranojë ta rrisë numrin e ulëseve të garantuara në Kuvendin e Kosovës për komunitetin serb, do të shpallë amnisti për qytetarët e veriut që kanë kundërvajtje dhe që nuk i kanë paguar taksat për shërbimet e ujit dhe energjisë elektrike si dhe do të krijojë edhe një ulëse shtesë për një përfaqësues të veriut në Këshillin Konsultativ për Komunitete në kuadër të Zyrës së Presidentit.

Asnjëri nga këto veprime nuk janë të parapara në dokumentin e presidentit Ahtisaari, por do të interpretohen si gatishmëri e institucioneve të Kosovës për të lehtësuar jetën e qytetarëve serbë të veriut. Esenca e gjithë kësaj, sipas një zyrtari vendës, është që të drejtave dhe benefiteve që parashihet t’u jepen serbëve të veriut, të mos u vihet ndonjë emër. Çfarëdo emërtimi me të cilin do të identifikohej veriu, siç ka thënë ai, rrezikon t’i inkurajojë serbët që jetojnë në pjesët e tjera të Kosovës të koncentrohen në atë zonë.

“Në momentin kur veriut i vë emër, qoftë si ‘status special’, qoftë si ‘Ahtisaari plus’, kjo do të ndikonte te serbët e komunave të tjera që t’i shesin pronat për t’u zhvendosur në veri, pasi aty do ta ndienin veten më të sigurt dhe më komod”, ka thënë ky zyrtar (gjerësisht në “Kohën Ditore”).

 

Komente (11)Shpërndaje artikullin

• 22:39Nga Serbia duhet të kërkohet kompensimi i dëmeve të luftës
• 22:30Peja shpallet kampione e BKT Superligës
• 22:21Tahiri priti biznesmenë nga Bursa
• 22:20Gjykata ukrainase nuk lejon mbajtjen e marshit homoseksual
• 22:19Daçiq porosit serbët e Kosovës të dalin në zgjedhje
• 22:15Gjermania, vendi më pozitiv në botë, Irani më negativi
• 22:12Niko Komani “i fut duart” Gentës
• 22:03Më shumë produkte të rrezikshme në Evropë
• 22:01Hitzfeld: Votoj për Bayernin, për shkak të Shaqirit!
• 21:50Ancelotti i sugjeron Real Madridit blerjen e Cavanit